GOARNA pentong lopo, tile! Adong na marcatur. Adong mardobol. Adong muse na juguk sande marangan-angan. On si Tapa mon alakna. Pas dei songon goar nia i, ning roa na martapa sajo. Olo, dung do nangkin ipangido ia tes paet, lek na sandema di susui lopo si Paet on. Sip sajo muse.
“Ulang do iboto alak Lopo si Paet. Pangidoan ni alak na tes paet sajo ma,” ning si Sangkot. Anggo mata nia ba, na adop si Tapa do.
“Ima ulang sarat na iparbaenan goar niba,” ning si Rohul. Baba na nyukap-nyakip mangan goreng na amilasanna. “Goar niba i dabo, do’a dei. Pala si paet goar niba, na paet sajo ma na ro.”
Sip soni si Paet. Pupu diombus ia api nia. Pupu manguncongkon mon-mon. Timbus ni sabut mantong di tataring nia. Aso inda mursop mon-mon nia.
“Goar ni dongan tai do dabo na pas,” ning si Ruslan. Itudu ia dot baba nia si Tapa. “Inda porlu gok kecek.”
Mangkair bulus si Sangkot. Hukkek doma si Rohul na atia pas minum sipode.
“Teon,” ning si Tapa bulus. Icabut ia abong ni igung nia. Ning roa na manyintak kail doma panarikna. Si Paet, parlopoi, homang ia jabat mangida na.
“Sangajo, anggo ita pangkail on, tile,” ning si Paet. “Ning roa do na adong sajo na manyoro.”
“Aso idokon ko soni?” ning si Lokot. Laos ijomputsa lopek. Pambuka ni lopek i da, na palan ma. Na biar ma lalana ning roa sar-sar. Na iambang ni bayoi do roangku gulo pasir isi ni bulung ni lopek i, so songoni palan na. Mandang giot dirampingkon si Paet ilala ia ngon tangan nai.
“Iboto homu do,” ning si Paet. “Pala si Tapa dabo, pangkail ma on na cocok na. Anggo mangisi umpan na ba, angkon si Lokot do.”
“Aha na muse mei,” ning si Rohul. Pupu iapus ia muse janggut nia. Janggut pe da tolu do abongna. Tai anggo pangabus nai, ning roa na sap ma sude janggut.
Giot idokon si Paet ma panarik ni abong ni igung nangkinan. Tai mabiar ia holas si Tapa.
“Bo ligi homuntong si Tapa, kahanggi nibai,” ning si Paet. Parjuguk nai ning roa, na dompak painte kail dei manyoro.”
“Pala si Lokot, sondia musei so tukang mambaen umpan?” ning si Rohul.
“Bo tai na papi antong parkarejona,” ning si Tapa. Inda idokon ia ba palan ni na mambuka lopek nangkinan i. Olo, naron marmantakan halak ru tu lopo nia, na karu boto i. Ee, inda nanga?
“Uambang dabo tu parmuko nai,” ning si Rohul.
Anggo si Tapa nga ompok roa nia bai. Pupu itarik ia abong ni igung nia. Marsitatapan si Rohul dot si Paet. Homang tongkin si Rohul. On dope so mangarti ia. Sangajo na suman ma panyintak ni kail.
“Ligintong parmuko ni Parebani. Pas dei alak Thailand?” ning si Paet. “Tai alak Thailand sajo ma le na dapoti kapalna, manangko gulaen di perairan Indonesia. Inda nanga?”
“Olo bana mei,” ning bayo na mulai nangkin inda mangarti ia kecek on. Ia giot nia dabo carito pilpres dei. Ning roa, na ia dei mancatur sude parmainan pilpres. Baen botona lalana. Pas songon goar nia, si Ucok Godang, godangan kecek sajo, hahai…
“Ita pe dabo, di Mandailing on, na pupu dei itangko alak Air Bangis gulaen laut ta,” ning si Bayo Godang. Jado idaho? Muloi ma. “Olo, tai sip dei soni pamarentah ta. I tenggelamkon nanga kapal nai, songon na ibaen si Susi i?”
“Susi dia dehe?” ning si Tapa. Olo, angke na jolo goar ni mantan nia dabo si Susi. Aso nga dosir tong daro nia?
“Bo ise dope si Susi, mantani ma?” ning si Bayo Godang.
“Mantan aha dehe?” ning si Tapa. Mur dosar taroktok nia. Adong he naso uboto na jolo, ning roa nia. Mitir ilala ia pat i.
“Mantan Menteri Kelautan mada!”
“Imada so manonton tipi iba,” ning si Rohul. Ulang mancabuti abong ni igung sajo karejo niba, ning si Paet ibagasan roa nia. Laos mikim ma ia, kehe tu dapur patuba api.
“Olo, au manombo manombo heran ulala pamarentah kabupaten taon,” ning si Bayo Godang. “Ibaen nanga songon na ibaen si Susi i? I tenggelamkon muse kapal nai.”
“Ho dabo, Lae, naso ibotomu do carito,” ning si Paet. I sartik ia sigaret nia. “Na ibuot ni alak Air Bangis dabo, gulaen ni alai dei. Tai muloi ngon Taluk na ipaiut-iut ni alai gulaen i. Bo marlange torus sampe tu Natal. Di Natal ma baru dapot. Ido na ibuot ni alai!”
“Olo, anggo gulaen Natal antong, ima na marlange tu Sibolga,” ning si Sangkot. “Ima so manis-manis gulaen Sibolga.”
“Ahana muse mei,” ning si Tapa.
“Bo, tai na marbadak dingin dei gulaen nai parjolo di Natal. Ngantong manis nida i? Hahai….” Ning si Sangkot laos mangkair.
Sip si Bayo Godang. Inda cocok ilala ia kecek i. Giot nia dabo torus do carito politik. I bayar ia kopi paet nia. GP sabatang tambana. Laos ke ma ia. Pindah lopo jolo roangku.
“Au dabo jabat carito badak dingin, na giot tata ma ulalai,” ning si Rohul.
“Ahana muse i,” ning si Lokot.
“Bo tai angkangmu na pajolo, alak Natal dei.”
“Sip babamu, inda angkang kui,” ning si Lokot. “Tobangan dau pado ho.”
“Tangion ma dabo jolo,” ning si Paet.
“Najolo dabo, atia rap iba dot angkang si Lokot.”
“Inda angkangku i,“ ning si Lokot.
“Olo, sanga ise mu ma,” ning si Rohul. “Ulang do roamu rap modom iba, na alit sajoma badak dingin na. Saborngin ning roamu, ala… inda na pade ilala dabo mengkeceti halak be. Mantan niba mantong, tele?”
“Ulang galang-galang dabo carito,” ning si Tapa. Asal ma carito mantan dabo margoso ma ilala ia i. Torus sannari dabo, naso tarlupaon ia dei jagal pojal na itoru ni Sibodak an. Atia ipaboru-boru mantong itarik amang nai. Ima so mancabuti abong ni igung sajo i. Songon na mancabut masa lalu roangku lalasa, hahai….
“Pas roamu marbalik au adop samping, ilala….” ning si Rohul. Ipadonok si Tapa juguk nia. “Na marnipi mantong iba ikojar jihin, tile? Hodokan doma! Olo. Pala tarsunggul au, tarligi au muko ni angkangmu, mangangguk au. Na uambang dei jihin sikabotul. Mangangguk muse angkangmu, baen songgot na.”
“Inda na itakik manyogot dongan on?” Ning si Paet.
“Bo sapai antong lunggu-lunggui?” Tai marturunan jabat lunggu banjar. I anggan kalak na ro panangko tonga borngini!”
“Inda yakin au i,” ning si Lokot. “Na ibaen-baen dei.”
“Olo. Ra dei dabo sangajo,” ning si Tapa. Di ingot ia antong badak Fanbo ni mantan i, si Susi. Ulang do taranggo ia badak Fanbo, na bulus mei taringot ia tu anak borui. Angke inda tallus badak Fanbo ni anak borui na jolo. Laos modom pe marbadak dei.
Aso ma roamu so marbadak sajo anak borui laos modom? Nga sai binoto ningia, marnipi ia marmayam tu poken. Ila mada roa naso marbadak. Ima so marbadak kinan iba laos modom. Ibaen muse epeng niba di cakuk. Pala marnipi mangan pocal iba di poken, so dong muse pambayarna.
Baen adong antong di lopoi poso-poso, iajari alai muse ma. Pala modom iba ning kalai, iontang muse mei kodi dongan niba. Pala marnipi marbagas iba, anso ulang be manjalaki kodi.
Olo, ioban bage ning kalai aek satauk-tauk. Mala marnipi maridi iba, so ulang loja be kehe tu batang aek an. Ima rupa ning kalai so mardalan-dalan alak na modom.
Na rarut ma carito lopo. Goarna pe na markombur. Mulai ngon porang Rusia-Ukraina, sampe tu Ganjar dohot Anies. Marsidokon obarna. Anggo si Tapa ba, inda mago pikiran nia ngon panggiling pocal ni mantan i, si Susi. (bersambung)
