BOPE boto na udan, laing ro do sada-sada jolma tu lopo si Paet on. Adong na marpayung. Adong muse na martudung salin maridi. Deba martudung palastik. Deba isurdungkon ia soni abit karung nia. Nagiot nida doma picak nia baen na.
Olo. Na ponting ro tu lopo. Mur udan, mur morgong alak di lopo. Naso somal pe mangan goreng, adong ma na mangido.
“Inda adong nanga goreng, Katua?” ning tobang-tobang na giot lobangon. Olo, pala goreng na tarlamun dabo pisangna, tolap dope mangilkilina.
“Goreng sukun do,” ning si Paet.
“Ilala…,” ning ompunta i. “Olo, inda da tarilkil be jabat sukun. I tolonan naron, sangkot muse di ola-ola niba.”
“Na jat dai…,” ning bayo muse. Laos martata ma sude.
BACA JUGA:
Taru pala udan songon on, nagiot mangankon sajo ma gari giot na. Parlopo i pe, si Paet, na mocom mei jagal na. Pocal doma naso ibaen nia. Inda diba dai, aya-aya manggiling pocal. Sanga madabo songgok, ning kalak ma naroni.
“Taru ibagas pe nangkin pisang siolot na mangkar masak ma na adong,” ning ompunta i muse. “Na lokot dope ikubak.”
“Inda diba dai,” ning si Lokot. Laos ibuotsa muse kacang goreng. Rungreng doma baba i mangan kacang gorang. Pupu dosir ijur ni ompunta.
I balun ompunta pusuk nia. Pangarsik nai da, ning roa pangidup ni poso-poso na apairanna. Hahai…
“Pala dabo, ipagilingkon tongkin kacang goreng i di ompung,” ning si Sangkot. Dor na mangalap-alapi sajo karejo ni on. “So ioban si Tapa tongkin tu si Susi an bo.”
Paet doma muko si Tapa. Olo, baen mantan nia parjagal pocal nai, tu sia muse ma ondas na.
“Inda diba dai,” ning ompunta i antong.
“Anso ulang mangilkil be.”
“Bope. Ja ompung mu adaboru ma gari usuru manggiling na? Tabo an dope panggiling ni i,” ning sa. Laos mangkair ma sude.
On mada tagi ni marlopo. Olo, aha antong karejo di bagas sajo. Mambege daganak na martunyak maia naron i. Tu saba pe, lang naso lobas do. Marbabo marudan-udan antong da, inda lobas i, kanen. Mitir ma naron pat niba di lupak i.
“Tes paet jolo,” ning bayo laos ipajuguksa.
“Bo, ro homu, Ompung,” ning si Sangkot.
“Ro mantong,” ning bayo i, Si Matnur. “Markurung pe iba di bagas, hum na marsipaligi-ligian ma naron dot iboto muyu i. Inda nanga?”
“Anggoi ba. Tarjomak iba muse naron.”
“Ehem…,” ning si Paet.
“Mangua do nanga, Paet?” ning si Matnur. Laos ibukana tapeles ni kacang goreng.
“Jabat dabo carito manjomak on, taringot ma iba….”
“Hum, aha muse i, parlopo?”
Laos papayak tes paet, laos ipajuguk si paet ma di lambung si Matnur.
“Imada,” ning si Paet. “Adong le na tarjomak sere. Adong na tarjomak na so jomakon. Najolo le, dompak menek-menek iba, tai lancat na ipangan ni aluang pe, ijomak do soni.”
“I dehe,” ning si Matnur. “I ambang muse jabat aha. Tambai homu le aek milas on jolo.”
Ala, ma tes paet, mangido tamba dope, ning roa si Paet. Habis soban niba pamilas aek. Paet doma muko nia laos jonjong.
“Na maol dabo na iklas on,” ning si Sangkot mangalap-alapi. “Hum na juguk dope toke i.”
“Tai na karejo niba ma i, Aya Lian,” ning si Paet. Laos ibuotsa inggung-inggung mangombus api. “Hope iklaskon bo eme na irondam ni aek i.”
“Saima, ibege ibotomu naron. Bangkit ronggot nia,” ning si Sangkot.
Olo, laos ro ma antong umak si Lian. Sandang arondukna laos tu saba.
“Bo, inda pe ke ita nanga?” ning umak si Lian bulus tu si Sangkot. Mikim si Paet di dapur.
“Na mangombus tapak dope alak antong, ma pio-pio angkangi,” ning si Paet.
“Ala, di saba naron bolak ubaen tapak ni angkangmu. Au bage naron i ombus-ombus ia,” ning adaboro i. Jado ida ho, bangkit ma!
“Pajolo ma dabo, ro au tongkin nai,” ning si Sangkot.
“Ngoni? Mardalan ma au sada-sada au di udan on tu saba?”
“Olo, inda pade dai,” ning si Paet.
“Soni saji mei angkangmu.” Biado? Main ma! “Abit pe naso ijombur dope isi. Taru na udan sajo. Cirik-lale on ma naron baju i. Pala jomburkon ma naron, so pajolo au.”
Jat muko si Sangkot.
“Olo,” ning si Paet. “Tai anggimu pe nangkin, nagoso ma marsege jombur na iduda tuari. Na hurang hiang mantong.”
“Imada,” ning adabori si Sangkot i antong. Teon, ning roa si Paet. “Anggo angkangmu, anggo inda didongani sajo, ra ma nanga roamu ia marsege i?”
Homang si Paet. Na centeng lalana tie? Na marsege do rupa.
Jonjong bulus si Sangkot, mendemes ke.
“Sigaret dope….” ning si Paet.
“Len di angkangmu, so mangidup ia,” ning si Sangkot.
Homang muse adaborui. Laos ke maripas-ipas. Hum na mago dope sambelok, laos mangkair ma alak na di lopo i.
Pas muse idaho mamolus muse anak boru na laos tu pancur. Bancut bulus. Na iambang sa muse do ia na ipartai ni halak i. Eh, si Susi do boto! Jagal pocal i! Mantan si Tapa!
Na bulus ipadonok anak borui muse ma tu si Tapa.
“Nangkon dabo jabat incak-incaki au,” ning si Susi dongan tu si Tapa. Laos ro ma iluna. “Aupe nga giotku sude on. Tai ho do na so ra mangalap au. I alap alak au ancit roamu….”
Homang si Tapa. Halak di lopo i pe sude sip. Maneteki dongan ilu ni anakborui laos ke. Na ibo ma baya roa. Olo.
Si Tapa pe na lolot ma sip. Polngit. Baen na mangkuling doma ompunta i.
“Jabat soni dongan, ngana pade itinggalkon i be,” ning ompunta i.
“Aso muse i tinggalkon, Ompung? Tai ngana adaboru niba!”
“Be, inda na ho nanga alak-lai nia, Mang?” ning ompu i tu si Tapa. Mur bile mada boto muko si Tapa. “Angke na homu do uida na jolo tu jae tu julu.”
Sip polngit sude. I mada masalah on. Ima so tondo sajo si Tapa.
Baen na ro doma da halak tu lopo. Mangido kopi ibungkus di palastik. Giot tu partukangan ning roa. Margoso muse si Paet manjalaki koje panambat na.
“Len bo jolo, Lokot,” ning bayo.
“Aso muse tu au mangido koje?”
“Nga binoto. Tai na ringgas komu andigan maryeye.”
“Andigan dehe. Anggo andigan do nimu, ompung on pe na maroban karben sajo dope on.”
“Olo,” ning ompu i antong. Rarat mon carito. “Tai najolo marpili jabat iba amporik tembakon i. Songgop boto silopak di ujung ni karben niba, i ayak dei. Olo, na godangan dontong arga ni pelor niba pado silopak nai.”
Mondok-ondok si Tapa. Botul do bai.
“Tai isi ma na jolo par dapot ni ompung mu pe,” ning ompung on muse. Mar sipature jugukna ma. “Bo, tai na pupu iba ro manembak tu saba. Ompungmu na mamuro muse. Pupu ulehen amporik pune. Olo, na jop sajo roa ni ompungmu.”
“Ngoni, Ompung?” ning si Tapa bulus.
“Pala ipalugut-lugut roangku bahat ni amporik na ulehen i, sarupo ma dohot sagodang ni ambeng.”
“Bo ra mei, Ompung?” ning si Lokot.
“Na ipaboru-boru dope ompungmu, dohot ma ia ningia manjalaki amporik. Nga upatola le.”
“Aso, Ompung?”
“Bo, itangko jihin ia naron, ise dope adaboru niba? Roma songon si Tapa i muse iba i,” ning ompui. Laos sip ma sude. Si Tapa pe bile mulak mukoi. (bersambung)
