“MA SAP boto gambar ni caleg,” ning si Jakodair bulus. Hum na juguk dope ia di lopo.
“Tai na marjagal,” ning Jamarsompeng. “Tudia na ramina dabo, tu su dei kehe alak manabusi.”
“Bo, inda ba,” ning Jakulabu bulus. Laos itariksa sigaret pusuk. “Ingot komu na jolo jagal batu loting na di pokeni? Sada ia do simbil di toru ni jior, tu si do alak margonti ro.”
“Ah, i dontong ke,” ning Jamarsompeng. “Baen na sada ia dei marjagal na soni.”
“Bo, adong do boto na sada ia parjagal na. Naso ro do uida alak tusi,” ning sada bayo.
“Aha musei,” ning parlopoi. Laos mamasu tapak. “Jagal ubat ni guam ma.”
“Ngana sai guamon alak tong,” ning nasada muse. “Mur ma gari marjagal miyak ni kapal terbang ia. Ngadong na manindo pe i.”
“Bo, anggo angkangmu ba di bagas, naso putus dei ubat ni guam nia,” ning Jamarsompeng. “Na momo guamon dabo angkangmu.”
“Guamon do sanga malatak?” Ning parlopoi muse.
“Guam mada,” ning Jamarsompeng. “Tai antong le na tagi lalana mandaisi.”
“Olo, mandaisi ambasang roangku. Ima so malatak,” ning parlopoi.
“Ambasang dabo baen na i sangkuliti dei so malatak. Lagi pe dabo, anggo ambasang do, ngana gioti angkangmu.”
“Ampot na isangkuliti angkang dontong?” Ning na sada muse.
“Inda botoanku komu dabo pado au,” ning Jamarsompeng holas. “Adaborungku do.”
Marsipan sude halak. Ma sala, ning roa ni halak.
Pala dabo, mangompoti ma ro jobos alak bagas ni Jamarsompeng.
“Angkang, buot jolo le ambasang na di parik tai. Orkot roangku,” ningsa ma.
Bulus jonjong Jamarsompeng. Demes ke na. Kopi na pe inda ibayar na be. Marsiligian sude alak na di lopo i.
“Guamon ma naroni bo,” ning Jakulabu bulus. Laos mangkair ma sude. (*)
