ON da buras do on. Goarna pe kecek lopo, tile. Marcarito mada aman ta on, atie markudo dope alak tu poken na jolo.
Nabiaso dei dabo kudo mancit boltok. Marbure-bure kaluar nakotor ni hoda. Hoda dabo, kudo ma i saro di ita.
Alak pe da antong ganjingan do alak manaek bendi, anggo songoni do hodar ni hoda.
Biama antong baenon. Ma diporo naborngini aek ni bulung botik. Laing na buruson dope hoda.
“Ah, disumpol doma da partuaekan ni hoda on,” ning roa ni Jamarsompeng. “Buatkon le abit buruk jolo.” Ning sa tu alak bagas na.
Tarsonggot alak bagas nai, Si Masna. Bo, abit buruk mantongke panyumpol ni na burere on, ning roana sajo.
Dibuatsa lampin na mapak. Dibalun Jamarsompeng. Laos dinyoknyokkonsa tu partuaekan ni hoda. Sumpol, singkop. Mantak na burereon.
Pendek ni carito, namanengget pe antong bahat ma jolma. Goarna pe na poken di Mompang ari Sinayan. Lopus Janji Matogu, menurun di Siramram. Maradian santongkin di Jambur. Sampe ma tu Mompang.
Marturunan panumpang, ditambat ma hoda on di jolo ni lopo parjamburan. Parjamburan dabo, parminuman mai saro na jolo. Ise ma sude paradianan ni parbendi, rap marsitambat hoda na.
“Bo na sirlak antong hoda mi,” ning Jakodair tu Jamarsompeng.
“Bole, tai ima tando ni na torkis hoda,” ning Jamarsompeng. Inda ba idokonsa, na dimiyaki dohot pati do nangkin hoda nai anso sirlak.
Marpikir mada Jakodair. Hoda nia le na muloi ma matobang. Na padema gadison tu Bukit Tinggi mambaen rondang. Tai gogo dope manarik bendi. Bia he pala marsambar iba, ning roha na. Laos idokonsa tu Jamarsompeng.
“Manukut pe da au kopi dua belek nai,” ning Jakodair. Midop kidop matana marharop.
“Jadi ma le. Dosir uida ijurmu. Marnipi-nipi muse hamu naron,” ning Jamarsompeng.
Martimbang hoda. Rap riang be laos manaek hoda. Sada tu jae, sada tu julu. Jakodair pe da, na sun ma lomo ni rohana.
Hum na sampe dope tu Padang Gurugur, tarida ma di Jakodair abit buruk na ure-ure di partuaekan ni hoda i.
“Aha muse mahe on,” ning rohana salaos manarik abit buruk panyumpol. Bus, ditariksa abit buruk, laos durus ma nakotor ni hoda. Margujo doma marderet-deret.
“Ilala, Jamarsompeng. Ma hona au da. Na buruson do hodamu,” ning sa salaos marnyungut-nyugut. (*)
