PUPU i putar si Paet lagu India, leng na so dong dope alak ro tu lopo. Aek pe ma milas ma. Manduruskon sajo doma gari. Si Paet pe, ma pupu tamba aek.
Tudia do nanga sude jolma on, ning roa si Paet. Na somal, halak bage doma ro marngoti ia, anso mambuka lopo. Baen sosak na.
Ala, na lupa mada Si Paet. Adong do antong orja sadarion. I pajolo alak dei tu orja. Patut do.
Bo, ma i si langganan nia sada. Si Tapa. Unduk-unduk parlao na. Jinjing solop na. Olo, ulang do ro udan, na biaran ia kotor solop nia. Na i gundar sajo dei solop i. Likek doma.
“Kopi jolo,” ning si Tapa laos juguk. I buot sa muse kacang goreng ngon tapeles.
I pamate si Paet lagu India nia. I baen sa kopi tu jolo si Paet.
“Manombo boto, jabat ubege orja, renge dei ulala ilu i,” ning si Tapa.
Ala, on mada na so maloi si Paet manjawabsa. Ngok do bulus pangkilalaan nia i. I paibo-ibo naron, tangis lalu bayo on, ning roa nia. Olo, anggo si Paet antong, ganop ari pe gari hona tinggalkon, ngana mangua ilala ia i. Ima so paet ibaen goar nia. So paet sajo mudar nia.
BACA JUGA:
Untung mada ro Sangkot. Masas mei naron ibaen sa sude.
“Na ribur mada di orja an,” ning si Sangkut bulus. *Bo na giot marnika ma roamu, pala inda ra be adaboru nai.”
“Intong…,” ning si Tapa bulus. I paturena parjuguk na. Bolnang matana. “Ngoni?”
“Bo, i elek-elek doma. Bope dabo les na ra, inda na tagi be nidaon ni halak. Olo. Anggo au gari, inda dongan teret ni adaboru au. Gok kalak.”
“Aa…,” ning si Paet muse. Gur-gur pe aek nia, inda na manyodar be. Baen na tungkin doma tutup ni udon, baru narlojong ia tu dapur.
Olo, ima nipingku potangin, mandang….
Bodat! ning si Paet. Iambang na sikabotul.
Laos mangkair ma si Sangkot.
Anggo si Tapa ma hambar sajo roa nia.
“Aha muse on carito na,” ning si Matnur laos ro. Oban piso guris na. Laos marlayan muse ma.
“Ee, ma ibaen ko dongan parlayanan lopo niba on,” ning si Paet.
“So lek bisa mada iba minum laos marlayan. Ja soni do, Reban? Baen kopi paet i le.”
Mocom carito. Goarna pe marburas di lopo. Marsidokon obarna. Anggo si Tapa, ma malosok ma ia mangkuling. Lek tu si Susi do roa nia. Mantan i. Na kojam ma dunia on, ning ia sajo songoni, i bagasan roa na.
Murrami lopo, murbahat carito. Sampe carito tu presiden Putin.
“Mandang, na beteng ubege marlange bayo i,” ning sada bayo ma. “Tahan na do ubege dabo markonong lima menit.”
“Ala, i oban tu rodang jolo gari sanga tahanna do linta,” ning na sada.
Adong muse ma na mandokon, na unjung do jolo mantan si Putin marbagas tu Ukrania. Ima ning sa so i tembaki si Putin sajo Ukrania. So mate alak lai ni mantan nia i.
“Olo, si Sumi dei dabo goar ni mantan nai,” ning bayo na sada muse ma.
Anggo si Tapa mur sip sajo. Tar songon goar si Susi dabo i bege ia.
“Tai si Saripuddin dei goar asli si Putin pe,” ning si Paet muse ma. “Dompak menek ia, pala i sapai goar nia, idokon sa sajo si Putin. Na so deges dopentong pangkulingna.”
“Ee,” ning bayo muse. Yakin muse antong bayo i. Masuk akal antong. Saripuddin, Pudin, Putin….
“Olo, tai Gorbachev pe kan si Gurbak dei goarna,” ning na sada muse.
On pentong, ra do bai, ning roa ni bayoi muse. Kapendepan do ruba Gurbak on, tie? Olo, naso unjung dontong ibege aha arti ni Gurbak. Na binoto gundar do. Pala bukbak doma, panganon.
“Pala Andy Lau pe, tai ngon andilo dei goarna. Inanta nia kan mambaen rajut dei najolo karejona. Kan ngon andilo mai ibaen. Partanak miyak dei inanta i. Ima so na taboan ilala ia timborang,” ning si Sangkot. Laos mangkardak ma sude.
On da kecek lopo do on. Goar na pe marburas. (bersambung)
Discussion about this post