ASO antong inda hambar roa si Paet. Isi agosoannya alak mangido minum, i si muse ma ro inang si Sahna manutung balanak.
“Tongkin pe dabo,” ning sa. Laos ipakaluarsa ngon baul-baulna balanak tundeman. Ginjang-ginjang na dope.
“Sanga sangkot dongan pat ni alak. Na ginjang uida balanak mi,” ning si Paet. Olo, adong-adong sajo dei tutungon ni anak boru on. Tuari ma joring. Tuari nai parira. Incogot aha muse ma roai?
“Malosok iba dabo pagara api,” ning inang si Sahna.
“Bo, mardahan songon dia?” ning si Paet.
“Indahan na tuari ma ia bai. Inda na mardahan sajo dongan karejo na marbagasi. Anggo na giot pardahan do giot ni angkangmu, bo jagal lontong na di toru lancat an ma adaboru nia! Ganop manyogot mangan lontong. Inda nanga?”
Olo da, ning roa si Paet. Hope anggo na giot manutung balanak do giotmu, au ma gari alak laimu, ningia muse di bagasan roa nia. Laos mikim-mikim ma si Paet. Inda tardok antong dai, ee.
BACA JUGA:
“Ehem…,” ning bayo ngon bariba mangida si Paet mikim-mikim. I sartikna sigaret Gudang Garam Merah.
Manyodar bulus si Paet. Iboto bayo i naron na di bagasan roa niba, na ila dai.
“Ala…,” ning si Paet doma. “Mabiar iba dabo sangkot pat niba, baen ginjang ni balanak mi. Tarsoltu baen balanak, na jat boto i.”
“Oih, dung itutung doma daboi, so ikorot-korot. Menek-menek antong itutung, lalu ma margulu abuan naron sude i,” ning inang si Sahna.
“Olo da,” ning bayoi, si Sangkot.
“Na galang sajo ma aum ni angkangmu painte balanak on bo. Angkon na margule balanak ma. Na enjeng dabo angkangmu,” ning inang si Sahna.
“Bo, pangidaan boto inda songoni i.” Main ma. Ma ipancing si Sangkot antong.
“Baya, manombo tai, i olihi bage dei gulaen ni angkangmu? Mabiar iba taroli ia.”
“Olo?”
“Olo, alaklai niba mantong, tele! Sanga mangua ning roamu, ise dope alaklai niba? Dot obukna sude usuri-utu dei. Manombo tile, ma langkot utu niba tu sia. Angkon rap isuri mantong. Ulang marpindah-pindah utu nai. Na sabantal mantong iba, tele!”
“Olo ba.”
“Olo. Na bisukan dongani pala usuri. Ubaen miyak manis na. Likek ubaen. Oih, ke ma au da,” ning inang si Sahna laos oban balanak tutungna. Muap, molbus doma sabanjar.
Tar saparopat jom do antong, roma aya si Sahna. Mangurpisi dope tanganna. Na baru sidung mangan mantong. Siak-siakan dope.
“Kopi do reban?” ning si Paet.
“Tes paet ma jolo roangku dabo,” ning aya si Sahna.
Pir bulus muko si Paet. Ma ngon iba soban panutung balanak na, tes paet dope pangidoan na. Kopi paet ma gari pinomat. Ning roa na.
“Na uskus dabo ulala gule muyu i, kahang,” ning si Sangkot.
“Ala, anggo angkangmu dabo, na botoan ia giot niba,” ning ayah si Sahna. “Indahan na milas-milas muse. Mar lasiak tuktuk. Ala. Ima dabo tagi ni na marbagas on.”
Nging… ning suping si Tapa na laos ro. Lek ibegesa sotik nangkin. Bancut doma muko nia laos juguk tu susui ni lopo i. Olo, baen inda pe marbagas ia, na ia sajoma obaran ni alak. Aso antong inda somak akal nia?
“Markolas roangku indahan nai, tie, Kahang.” Ma ipancing si Sangkot muse. Olo, nangkin antong ning adaboru i, indahan nangali do. Indahan tuari. On ma milas-milas caritona.
“Olo mantong,” ning aya si Sahna. “Ima so marbagas iba. So dong pardahan niba.”
Giot mangkair bulus si Sangkot.
“Tai au pe najolo, na giot marbagas ma au dot parjagal lontong i,” ning si Paet manguman-umani na nidok ni adaboro i nangkinan. Tai, on ma masalahi da! Bulus ke boto Tapa. Angke mantan nia i.
“Kopi on?” ning si Paet mandok si Tapa. Olo, taru ma ibaen.
“Dung ngali ma incogot diau,” ning si Tapa mendemes.
Maccom muse muko ayah si Sahna. Songon na ibotosa na indahan ngali na ipangan nangkinani, ning roa na.
“Tai na ngali manombo, ido na padena,” ning aya si Sahna. Maksud nia dabo, indahan ngali nakinan mon.
Bo, bulus itauk si Paet tes paet na ngali. I payakonsa di jolo aya si Sahna.
Hum ijama aya si Sahna, maruba bulus muko nia.
“Sasakali padean dei nangali, Reban,” ning si Paet bulus. “Homu na baru mangan indahan na milas muse. Nga suman dabo i aek na milas be! Pake es doma gari inumon muyu pe. Tai ngadong dompak es ta bo.”
“Bo, painte udokon di angkangmu da,” ning aya si Sahna. Laos manaek dope tu bagas, ma i sorpa adaborui? Jonjong ia di pintu i.
“Aha? Es?” Ning inang si Sahna. “I ambang ko pardahan-dahanmu au! Kei pangido tu jagal lontong i! Ima di homu na dua dot si Paet.”
Pur-par, mocom. Marroan daganak mangaligi. Adong bage inang-inang na mambuka tingkap mangaligi.
Anggo aya si Sahnah, mangundut doma di tangga bagas i. I buot na tajak, maripas kehe.
“Bo, tes paet on?” ning si Paet.
“Lehen diangkangmu,” ning sa mandemes.
“Lehen tu jagal lontongi,” ning inang si Sahna muse. Demes laos manutup pintu.
Homang doma si Paet dot si Sangkot marsiligian.
“Aha suadana baya di iba,” ning si Paet. Laos i sumpakkon sa aek ni mangkuk i.
“Songon na baru marsitembakan dabo ubege,” ning bayo laos masuk tu lopoi. Tar tobang, na hurang muse parbinegean.
“Olo, Uak,” ning si Sangkot. “Tai musim on porang Ukrania dohot Rusia.”
“Rusia boto sarupo dohot Ruslan mei,” ning amantai muse. “Tai ima na jolo so si Ruslan goar ni ompungku.”
“Naginjang carito ni on,” ning si Paet asok.
“Bo ginjang mantong,” ning amantai muse. “Na ginjang godang alakna. Songon iba juo ma.”
Marsitatapan si Paet dohot si Sangkot.
“Pala Ukrania, sondia muse i,” ning si Sangkot. On ahli na mon mangalap-alapi alak.
“Aha nangkin?” Ipadonok amanta i suping nia.
“Ukrania…”
“Umak nia?” Ning amanta i. Na sala bege mantong tele. Ukrania ning kalak, umak nia do ibegesa. “Aupe naso uboto doba goar ni i. Pokokna antong umak ni ompung niba ma. Adong doba goar ni i.”
“Olo,” ning si Sangkot. “Patut mantong ning roa si Paet inda dong goar ni i, tele Uak?”
“Na di goar dei najolo. Ngadong alak naso ibaen goar na.”
Ala… ma sambang kaji.
“Manombo dabo mangalap-alapi sajo parlopo on,” ning si Sangkot. “Aha do minum ni Uak?”
“Bo, jado ida ho. Kopi ma baen.”
“Kopi baen, Paet,” ning si Sangkot.
“Olo, ibaen muse na ngali,” ning si Paet asok.
“Mangua ningia,” ning amanta on.
“Nangkon ningia ibayar Uak be naron. Na jarang dontong Uak ro,” ning si Sangkot. Teon, Paet, ning roa nia.
Sip tong si Paet. Ibaen ia kopi paet. Ijajar amanta i muse antong goreng.
“Anggo goreng nai, alaima mambayarna ningia, Uak,” ning si Paet.
“Olo da. Iba dabo nga songon na jolo be,” ning amanta i.
“Olo. I pangan Uak ma.”
Taro ro muse ma alak mangalap si Sangkot. Marompot ibayarsa goreng ni amanta i. I potong si Paet dohot kopi na.
“Aso dohot kopi,” ning si Sangkot.
“Ngadong panukarna.”
“Bodat,” ning si Sangkot laos ke.
“Bodat nise muse na maluai le,” ning amanta i.
“Bodat si Sangkot, Uak,” ning si Paet. “Malua ningia.”
“Ala baya,” ning amanta i laos jonjong maripas. “Tingkap niba na buka sajo.”
Ipasandar si Paet tu susui ni lopo i. Itarik sa muse sigaret Indojaya. Ro pe alak minum na mambaen susah do sude, ning roa na. (bersambung)