ANTARGAN so bahat dope motor tu Medan, marangkat ma si Naknun tu tano Deli. Lek naso dapot tong ison boru, tu Medan doma jolo di ranto on, ning rohana mada.
Potang dope ma di topi dalan si Naknun, sandang kopor presiden na. Sebakna cikek gombung, uap ni miyak Lavender molbus. Marmedan le goarna, angkon na hum parlente mei dabo pamakena. Biasna pe sasilon na marirta, ulang tong magumeng tu jabat iba, ning na ma.
Ee…, na lupa do rupa manyorpi abit salendang. Habis ma naron ingat-ngat monci i, ning roana. Taru na ilehen si Tiara dei abit ragi kacangi musim suanon na lewat.
I ompotkon ia mulak tongkin, manyimpan abit tu bagasan kopor bosi.
Apuskon mulak minyak sinyong-yong on. Angke ma muloi mela uskus nai. Pupu ianggo kihik, ala, lek adong doba muap ni ancok sotik. Ngamangua dai be. Ngana tarilakkoni. Tai ima so ibaen minyak usukusna tele.
Hum na kaluar dope ia ngon bagas, ma pio-pio kalakson ni motor ALS. Marcipur-cipur doma si Naknun mangkojarna.
Tibu mulak bere, ning Ayah si Nangkan pabuot sa.
Sadapot ni boru mantong Tulang, ning si Naknun. Ijalang ia sada-sada.
Renge doba ilala ia ilu i. Angke on dope ia dipabuot alak. Ise musentong na giot pabuot ia. Nga adaboru ia.
Dapot karosi muse bariba tingkap. Na lamam tong jugukan on, ning roa nia. Tarbege muse lagu Ulang Martandang ni Anasty. Na tagi mada. Pupu muse ma idaho diulak-ulaki supir nai.
I angkat ia pat, i pasandar ia. Tinggal ko lupak ni saba, ning ia muse sada-sada ia.
Mamolus mulai ngon sidimpuan, torus tu Tarutung, sampe tu Parapat. Maradian mantong, mangan goarna.
Saumur on dope ia mangan di lopo. Gulena pe ihan na bolon, siak porok. Ihan na ngon dano ning kalai. Hum dua ilkil dope ma itolon ia. Habis dei tabo nai pala lolot diilkil, ning roa nia.
Masuk, masuk, ning sitokar muse manjou.
Ah, um na butong dope dongan ma marangkat muse, ning roa si Naknun. Bulus maripas ia minum, tu saraor katun i doma diapuskon tanganon.
Nging ning motor. Martukar lagu El-Surya.
Tidak semua… hasrat kan sampai… ning lagui. Ala, na pas madaon ning roa si Naknun. Ipa pitpit ia mata nia. Pupu jumbol si Tiara tu pangkilalaan, pupu ditueskon ia. Kei tusi, di sabaan maho unggil ganop ari, ning roha nia.
Tarpodom juo dontong da. Pala tarsunggul ia ma muloi torang-torang dangka ari. Ma idia roai on, ning roa nia. Pupu ligi tu luar.
Songon na utanda-tanda dabo kampung naon, ning roa si Naknun. Songon na jot-jot do ilala ia ida ia sude. Tai na on dope ia tu Medan.
Pala so ma motor on. Marturunan sude panumpang.
Bo ma sampe nanga roai, ning roa si Naknun. Turun muse ia. Pala ibaca ia merek ni parjagalan on: Rumah Makan Saroha Panyabungan.
Astaga. Sirit nia da. Na sala tengget motor do rupa ia di parapat. I ambang ia do motor tu Medan, ape motor mulak tu Panyabungan do. Na ila mada. (*)
Discussion about this post